બજરંગી ઓ હનુમાન બજરંગી,

બજરંગી ઓ હનુમાન બજરંગી,
રામ સીતાની સેવામાં સંગી  હનુમાન બજરંગી,
શક્તિશાળી ઓ હનુમાન શક્તિશાળી ,
સિતા કાજે તે લંકાને બાળી હનુમાન બજરંગી,
તને ચડે છે તેલને સિંદુર, હનુમાન બજરંગી,
તને ચડે છે આકડાની માળા હનુમાન બજરંગી,

ફૂલડાં કોને ચડાવશુ?

બગીચામાં ખીલ્યા છે ફૂલ, ફૂલડાં કોને ચડાવશુ?
રામને ચડાવશું ને સીતાને ચડાવશું,
રામ ગયા છે વનવાસ ફૂલડાં કોને ચડાવશું ?
શંકરને ચડાવશું ને પાર્વતીને ચડાવશું,
શંકર ગયા છે કૈલાસ ફૂલડાં કોને ચડાવશું ?
કૃષ્ણ ચડાવશું ને રાધાને ચડાવશું,
કૃષ્ણ ગયા છે ગોકુળ ફૂલડાં કોને ચડાવશું ?
વિષ્ણુંને ચડાવશું ને લક્ષ્મીને ચડાવશું,
વિષ્ણું ગયા છે પાતાળ ફૂલડાં કોને ચડાવશું ?

હનુમાનજી દેજો સંદેશો ....

હનુમાનજી દેજો સંદેશો મારા રામને આટલું કહેજો મારા રામને
 હનુમાનજી દેજો સંદેશો મારા રામને,
અશોક વનમાં ઝૂરી રહી છુ, રામના વિયોગની વેદના ધરું છુ,
 વહેલા મોકલજો મારા રામને હનુમાનજી દેજો સંદેશો મારા રામને
રાક્ષસોની ભૂમી છે  દગા ભરેલી, લંકાની નગરી તો સોને મઢેલી,
એવું કહેજો મારા રામને હનુમાનજી દેજો સંદેશો મારા રામને.
લંકાની નગરીનો રાજા રાવણ છે, દસ એના મસ્તકને વીસ એના હાથ છે,
ચેતાવી દેજો મારા રામને હનુમાનજી દેજો સંદેશો મારા રામને.
 હનુમાનજી દેજો સંદેશો મારા રામને.

પ્રભુ નમીએ પૂરી પ્રીતે

પ્રભુ નમીએ પૂરી પ્રીતે, સુખી કર તું દુઃખો હર તું.
બનાવી તે બધી દુનીયા, બનાવ્યા તે ઊંડા દરીયા.
સૂરજને ચંદ્ર ઝગમગીયા, સુખી કર તું દુઃખો હર તું.
વળી આકાશમાં તારા ઘણા ઊંચે જ ફરનારા.
કર્યા છે તે પ્રભુ પ્યારા સુખી કર તું દુઃખો હર તું.
જગત આખા ઉપર તારી નજર ફરતી રહે ન્યારી.
અમારા કામ જોનારા સુખી કર તું દુઃખો હર તું.
નમીએ હાથ જોડીને સુખી કર તું દુઃખો હર તું.

ભક્તિ કરતાં છૂટે મારા પ્રાણ

ભક્તિ કરતાં છૂટે મારા પ્રાણ પ્રભુજી એવું માંગુ હું,
રહે જન્મો જનમ તારો સાથ પ્રભુજી એવું માંગુ હું,
તારું મુખડું મનોહર જોયા કરું,
રાત દિવસ ભજન તારું ગયા કરું,
રહે અંત સમય તારું ધ્યાન પ્રભુજી આવું માંગ હું.
મારી આશા નિરાશા કરશો નહીં,
મારા અવગુણ હૈયે ધરશો નહીં,
શ્વાસે શ્વાસે રટૂ તારું નામ પ્રભજી એવું માંગુ હું.
મારા પાપને તપ સમાવી લેજો,
તમારા નંદને દાસ બનાવી દેજો
દેજો આવીને દર્શન દાન પ્રભુજી એવું માંગુ હું.
ભક્તિ કરતાં છૂટે મારા પ્રાણ પ્રભુજી એવું માંગુ હું,
રહે જન્મો જનમ તારો સાથ પ્રભુજી એવું માંગુ હું,

તાળી પાડીને રામનામ બોલજો રે,

તાળી પાડીને રામનામ બોલજો રે,
એવા અંતરના પડદા ખોલજો રે, તાળી પાડીને રામનામ બોલજો રે,
મને શંભુ મળ્યા છે સોમવારથી રે, તાળી પાડીને રામનામ બોલજો રે,
મને માયા મળી છે મંગળવારથી રે, તાળી પાડીને રામનામ બોલજો રે,
મને બુદ્ધી મળી છે બુધવારથી રે, તાળી પાડીને રામનામ બોલજો રે,
મને ગુરૂ મળ્યા છે ગુરૂવારથી રે, તાળી પાડીને રામનામ બોલજો રે,
મને શંકર મળ્યા છે શુક્રવારથી રે, તાળી પાડીને રામનામ બોલજો રે,
મને હનુમાન મળ્યા છે શનીવારથી રે, તાળી પાડીને રામનામ બોલજો રે,
મને રજા મળી છે રવીવારથી રે, તાળી પાડીને રામનામ બોલજો રે,
એવા અંતરના પડદા ખોલજો રે, તાળી પાડીને રામનામ બોલજો રે,

પ્રભો અંતર્યામી

પ્રભો અંતર્યામી જીવન જીવના દીનશરણા,
પિતા માતા બંધુ, અનુપમ સખાહિતકરણા;
પ્રભા કીર્તિકાન્તિ ધન વૈભવ સર્વ સ્વજનના,
નમું છું, વંદુ છું, વિમળમુખ સ્વામી જગતના.
અસત્યો માંહેથી પ્રભુ ! પરમ સત્યે તુ લઈ જા,
ઊંડા અંધારેથી, પ્રભુ ! પરમ તેજે તુ લઈ જા;
મહામૃત્યુંમાંથી, અમૃત સમીપે નાથ ! લઈ જા,
તું હીણો હું છું તો તુજ દર્શના દાન દઈ જા.

એક જ દે ચિનગારી, ........

એક જ દે ચિનગારી, મહાનલ ! એક જ દે ચિનગારી.
ચકમક લોઢું ઘસતાં ઘસતાં ખરચી જિંદગી સારી
 જામગરીમાં તણખો ન પડયો, ન ફળી મહેનત મારી મહાનલ... એક જ દે ચિનગારી...
ચાંદો સળગયો, સૂરજ સળગયો, સળગી આભઅટારી
ના સળગી એક સગડી મારી, વાત વિપતની ભારી મહાનલ... એક જ દે ચિનગારી

ઠુંડીમાં મુજ કાયા થથરે, ખૂટી ધીરજ મારી
વિશ્વાનલ ! હું અધિક ન માગું, માગું એક ચિનગારી મહાનલ... એક જ દે ચિનગારી...
- હરિહર ભટ્ટ

મંદીર તારૂ વિશ્વ રૂપાળું,

મંદીર તારૂ વિશ્વ રૂપાળું, સુંદર સર્જનહારા રે.

પળ પળ તારા દર્શન થાયે દેખે દેખણહારા રે.

નહી પૂજારી નહી કોઈ દેવ નહી મંદીરને તાળાં રે.

નીલ ગગનમાં મહીમાં ગાતા ચાંદો સુરજ તારા રે.

વર્ણન કરતાં શોભા તારી થાક્યા કવિગણ સારા રે.

મંદીરમાં તું ક્યાં છુપાયો શોધે બાળ અધીરા રે.

મંદીર તારૂ વિશ્વ રૂપાળું, સુંદર સર્જનહારા રે.